سويت من روس القوافي مشاعيل
شاعر واصوّر فكرتي واعتمده
اواصبها مني كما جاري النيل
على الورق وآجيبها في وعدها
***
وغرفت من بحر القوافي تماثيل
وركزت بـ صخور المعاني وتدها
وخذيت لي جوله وانا احط وآشيل
ابني قوافيها واثبت عمدها
***
قصيدة(ن) مثل المطر والهماليل
حقوق بارقها صدوق(ن) رعدها
سلام يا ربعي هل البن والهيل
عوق النفوس اللي ذبحها حسدها
***
سلام(ن) احلى من حليب المباهيل
عوج الرقاب اللي قديم(ن) رغدها
حنا ورثنا العز جيل(ن) عقب جيل
وافعالنا ما تنحصي من عددها
***
فرسان طيب وكلبونا مشاكيل
وصغيرنا روس المعالي صعدها
وامجادنا تعرف على قرّح الخيل
اللي ترج القاع من ضرب يدها
***
تضبح , ولا تفحم , ولا هدّها حيل
مصرّده للموت بأقوى جهدها
من فوقها رجال(ن) كما الموج والسيل
واقسى من جبال السراة بجلدها
***
وليا نخنّا لابسات الخلاخيل
اعمارنا ترخص علينا بعدها
نكسر خشم منهو تعدّى ولانعيل
وكم من عجوز(ن) راح منها ولدها
***
ماهي غريبه شربنا للفناجيل ؟
كم عزوة(ن) من شلفنا في لحدها
حنا سماً تمطر على الأرض وتسيل
من الكرم والجود وكلن شهدها
***
حرب(ن) على اللي يجحد الحق ويميل
وسلمن على اللي حقوقنا ما جحدها
وخوينا تحرم عليه الغرابيل
ما نجحد الرفقه وننكر عهدها
***
وتاريخنا يكفي عن القال والقيل
وامجادنا منهو بغاها وجدها
واليوم جينا للقى والمواصيل
وهذي قبيلة حرب حنا سعدها
***
الله يبارك بالرجال الزناجيل
حضورهم مثل المزون وبردها
واللي تعذّر ياعساها تساهيل
عذره معه لو غيبته نفتقدها
***
قدّمت قافي للكرام الحلاحيل
قصيدة(ن) تروي ظما من وردها
يطيب راسي لا تجمّلت ثم قيل
الله يبيّض وجه منهو قصدها
الشاعر \ صالح جزا الحربي
No comments:
Post a Comment