أبحاول أرسل وإنت حاول تحاول لي... وشرواك ذيب .. موجته تلقط إرسالي
وقرب لي إذنك وإنت لاهنت مصغ لي... أبهمس فيها بس لا يدري الوالي
انا ياعميلي عان وسمي على بلّي... علام الوسوم اللي على بلّك اشكالي
وش اللي جرى ويش السبب يافتى قلّي... علام العلوم علوم جزلات وهزالي
لاصرت فوقي ماانت ملزوم تنزل لّي... ولاصرت حدري ما انت مكلوف ترقى لي
وكانك تقول الناس قالت فـ عيـّــن لّي... من اللي سلم من راعي القيل والقالي
ولاتبعد ابداً بس من ملّك وملّي... تحسس ودوّر كم حقودٍ ومحتالي
بلانا بلانا بيننا دوم ينسلّي... ومنا بنا واشين ورخوم وانذالي
وبالناس يابن الناس طامن ومتعلّي... وانا ما ارفع الطامن ولا اطمن العالي
وقلبي دليلي يا عميلي يدربل لّي... واميز هماجه قبل اذوقه من الحالي
وانا احَمْد ربي ماخبرت القدم زلّي... ومشيي لك الله دوم دغري وطوالي
ولا اداني العيله ولا الميل لو ملّي... ولا اطفف لغيري ولا ازيد مكيالي
نفسي عزيزه بالردى ماتسولّي... وسود النوايا ماتشوش على بالي
وانا داري انك يافتى الجود وافيٍ لّي... ولاهي غريبه منك ياطيب الفالي
وعلى كل حالٍ جيت كلي على حلّي... خذني شقيقٍ لك على كل ابو حالي
أبلبس على ماتشتهيه انت فصّلّي... وإضبّط عسى الله مايعريك تفصالي
وقل واهني اللي عن الناس متسلّي... دليخٍ فضيخٍ دالهٍ خاليٍ سالي
الشاعر خليل الشبرمي
